Rwanda Shima Imana yambutse imipaka: Abanyarwanda mu Budage bashimiye Imana, basengera u Rwanda.

Ku nshuro ya mbere, igikorwa cya Rwanda Shima Imana cyabereye hanze y’u Rwanda, gihuriza mu Budage Abanyarwanda batuye mu Budage n’inshuti z’u Rwanda, ndetse n’abaturutse mu bindi bihugu by’u Burayi, mu gikorwa cyari kigamije gushimira Imana ibyiza yakoreye u Rwanda. Rwanda Shima Imana Germany 2026, yabereye i Berlin ku wa 29 Kanama 2026, itegurwa n’Ihuriro ry’Abakristo baba mu gihugu cy’Ubudage baturutse mu matorero atandukanye ku bufatanye n’Umuryango wa Diyasipora y’Abanyarwanda mu Budage (RCA Germany).

Rwanda Shima Imana Germany yateguwe nk’umwanya wo guhuriza hamwe Abanyarwanda mu gushimira Imana ibyiza n’imigisha yagiriye u Rwanda mu rugendo rw’iterambere rimaze kugerwaho, ndetse no gukomeza kubaka ubumwe n’ubusabane hagati y’Abanyarwanda baba mu mahanga. Iki gikorwa kandi cyari kigamije gusengera u Rwanda n’Abanyarwanda no gushishikariza abari muri Diyasipora gukomeza gutanga umusanzu mu kubaka igihugu.

Igikorwa cyitabiriwe n’Ambasaderi w’u Rwanda mu Budage ari nawe Mushyitsi Mukuru, Nyakubahwa Igor César, abayobozi b’amatorero atandukanye mu Budage, ndetse n’abavugabutumwa n’Abanyarwanda baturutse mu bihugu bitandukanye by’u Burayi.

“Dufite byinshi byo gushimira”

Uhagarariye Abanyarwanda batuye mu Budage, Hervé Kubwimana, yashimiye abitabiriye iki gikorwa, agaragaza ko amateka y’u Rwanda n’urugendo rw’imyaka irenga 30 rwo kwiyubaka ari bimwe mu byo Abanyarwanda bafite byo gushimira Imana. Yagize ati: “Turashima Imana yaduhaye ubuzima, ikaturinda, ikaduha umugisha w’igihugu cyiza n’Ubuyobozi bwiza. Iyo turebye amateka y’u Rwanda, tubona byinshi dufite byo gushimira. Mu myaka 32 ishize, twatangiye urugendo rukomeye rwo kwiyubaka. Uyu munsi, u Rwanda ruhagaze neza kandi rukomeje gutera imbere.”

Yagaragaje ko impinduka zigaragara mu bukungu, ubuzima, ibikorwa remezo n’ubuvuzi atari imibare gusa, ahubwo ari impinduka zigaragara mu mibereho ya buri munsi y’Abanyarwanda. Yasabye Abanyarwanda baba mu mahanga gukomeza gutanga umusanzu wabo binyuze mu bumenyi, ibitekerezo n’ibikorwa bigamije guteza imbere igihugu.

Ubuhamya bw’urugendo rw’u Rwanda n’ubuzima bw’Abanyarwanda

Muri iki gikorwa hatanzwe ubuhamya butatu bwagarutse ku mateka y’u Rwanda, Jenoside yakorewe Abatutsi, urugendo rwo gukira ibikomere no kwiyubaka.

Umuvugabutumwa Mary Kabana yagarutse ku buzima yabayemo ari impunzi muri Uganda, avuga ko agarutse mu Rwanda yabonye impinduka zikomeye mu bikorwa remezo, uburezi, n’ubuvuzi. Nyuma yo kugera mu Budage mu 2016, yavuze ko yasengeye kubona ahantu Abanyarwanda bahurira bagasenga, maze atangiza itsinda ryaje gukura uko imyaka yagiye ishira.

Pasiteri Clemence Muramutsa, warokotse Jenoside yakorewe Abatutsi akaba atuye i Hannover, yagarutse ku mateka y’u Rwanda no ku rugendo rwe rwo gukira ibikomere nyuma yo kubura umuryango we muri Jenoside. Yavuze ko gukira ibikomere ari urugendo rurerure kandi rukomeye, ariko ko yaje kwiga kubabarira nyuma yo kwakira agakiza. Ati: “Gukira ibikomere n’ububabare ni uguhitamo kubaho, kandi kubaho neza.”

Mu izina ry’urubyiruko, Blessing yashimiye igihugu n’ababyeyi, agaruka ku kamaro k’uburezi, imishinga n’amahirwe ahabwa urubyiruko.

Gushima bigomba kujyana no kutibagirwa aho igihugu cyavuye

Mu ijambo ry’Imana, Pasiteri Emmanuel Nsenga, umwe mu bateguye iki gikorwa, yavuze ko Rwanda Shima Imana mu Budage ari intangiriro y’urugendo rugamije gukomeza gusigasira umuco wo gushima. Yifashishije Zaburi 116:12-13, yagarutse ku cyo umuntu yakwitura Imana ku byiza yamukoreye, ashimangira ko kimwe mu bikomeye ari ukuyegurira ubuzima no kwakira agakiza kabonerwa muri Yesu Kristo.

Yagarutse kandi ku mateka y’u Rwanda mbere na nyuma ya Jenoside yakorewe Abatutsi, ku gukira ibikomere, kubabarira no gukomeza kubaka ubumwe. Yashimiye Abanyarwanda bagize ubutwari bwo guhagarika Jenoside yakorewe Abatutsi ndetse n’ababashije kurinda abahigwaga. Ashimangira uburyo u Rwanda rwiyubatse nyuma ya Jenoside yakorewe Abatutsi bishingiye mu buryo rwafashe icyemezo cyo kubakira ku bumwe, aho amacakubiri atagomba kongera kugira umwanya.

Yifashishije kandi Gutegeka kwa Kabiri 8:10-18, yibukije ko umuntu adakwiye kwibagirwa Imana amaze kubona imigisha n’iterambere, ahubwo ko ibyo agezeho bikwiye kumwibutsa aho byose bituruka.

“Amasengesho yacu akwiriye guherekezwa n’ibikorwa”

Ambasaderi w’u Rwanda mu Budage ari nawe mushyitsi mukuru, Nyakubahwa Igor César, yashimiye abateguye iki gikorwa, abayobozi b’amatorero, inshuti z’u Rwanda ndetse n’Abanyarwanda bari bateraniye hamwe. Yashimangiye ko gusenga no gushima bigomba kujyana n’ibikorwa bifatika.

Yagize ati: “Amasengesho yacu akwiriye guherekezwa n’ibikorwa. Niba dusengera amahoro, tukaba abantu barinda kandi baharanira amahoro; niba dusengera ubumwe, tukaba abantu babuharanira mu miryango no mu bikorwa byacu bya buri munsi; kandi niba duhora dusengera ubukungu n’iterambere, tukibaza uruhare buri wese yagira muri iryo terambere.” Yongeyeho ati: “Isengesho riduha ikizere, ariko ibikorwa ni byo bituma icyo kizere kiba impamo.”

Ambasaderi César yavuze ko ubutumwa bwo gushima no kubaka ubumwe bufite umwihariko ku Banyarwanda kubera amateka igihugu cyanyuzemo. Ati: “Inshingano si ukwibuka gusa ibyabaye, ahubwo ni no gukora ngo bitazongera kubaho. Bisaba ubumwe, kubabarira, inshingano n’ibikorwa, ariko ikiruta byose ni urukundo.”

Yasabye Abanyarwanda kugira uruhare rugaragara mu kubaka igihugu, ashimangira ko buri musanzu ufite agaciro, agira ati: “Ibyo twasabye Imana tubigire ibyo twiteguye gushyira mu ngiro.”

Gushima byajyanye no gufasha

Rwanda Shima Imana kandi yaranzwe n’igikorwa cyo gutura, aho abitabiriye batanze umusanzu wo gufasha gahunda ya Dusangire Lunch, igamije kugaburira abana ku mashuri yo mu Rwanda.

Igikorwa cya Rwanda Shima Imana Germany 2026 cyasojwe n’umwanya wo gusengera u Rwanda, Abanyarwanda n’imiryango yabo, wayobowe na Apôtre Verdiane Kayirangwa na Pasiteri Angelique baturutse i Namur mu Bubiligi, ari kumwe na Pasiteri Steven Ntwari waturutse muri Polonye, Pasiteri Rüdiger utuye Berlin, na Pasiteri Eric Ruhagararabahunga waturutse i Bruxelles mu Bubiligi.